【名家專欄】【Kenneth Kwok】數業人生：分析數據，沒你想像中簡單

「量度」

好多人以為做數據分析好容易，大家都好似睇緊同一樣嘅數字，但係每間公司所量度嘅嘢都好唔同。其實原因好簡單，大家嘅策略唔同，營銷手法，網站設計，等等都會有唔同嘅款式方法。雖然有某啲分析方法可以誇行業去使用，只不過有八九成嘅分析都會唔一樣。所以你問我點樣量度嘅話，我都會同你講無一個標準，因為每個案例都好唔同。如果可以個個一式一樣咁我就輕鬆好多。

「分析」

當然每個數據分析師都有自己嘅一套分析嘅方法，就算大家分析同一樣嘅數據，可能大家得出嘅結果都會有唔同。不過如果要認真量度一間公司嘅策略，一般都會同金錢掛鈎！因為所有嘢都係投資同回報，如果真係要認真量度嘅話，其實真係要有一個收集數據嘅策略。不過香港好多公司都好短視，所以係嚟方面嘅投資十分之少。要認真量度公司嘅業務首先要將數據貫通，如果唔係就無可能掌握全面嘅資訊。

「網站」

好多中小企經常遇到嘅問題就係唔知點樣可以運用數據，而最基本嘅一定係自己網站嘅數據。因為如果連一個網站都無，老實講好多嘢都無辦法分析到。只係單靠一啲基本嘅廣告數據其實分析唔到啲乜嘢，因為只係知道市場對廣告嘅反應，分析嘅都只係停留係推廣嘅層面。所以要了解自己嘅客戶，一個好嘅網站係不可缺少。正所謂數據不流別人田，自己網站嘅數據係最緊要，最有用！

本文內容由作者 Kenneth Kwok 授權轉載，原文標題為：點量度，文章標題由 TechApple 編輯部修訂。以上言論屬於作者個人意見，並不代表 Techapple.com 立場。

作者簡介：郭嘉俊 Kenneth Kwok ，畢業於澳洲麥覺理大學工商管理碩士，近年專注數據分析行業推廣同發展。曾從事平面設計，網站開發，企業管理及商業諮詢等工作，於 2010 年創辦 Beehive Strategy （蜂策略），為亞太地區不同企業提供數據分析服務。公司網址：Beehive Strategy