【名家專欄】【Kenneth Kwok】數業人生 ： 數據是冷血的
「尊重」
數據係一樣好冷血嘅嘢，而要利用數據去做商業決定嘅話，咁首先就唔好質疑數據，除非啲數據係收集嘅過程就已經出錯咗！如果唔係分析完結果之後，好多時就會出現輸打贏要嘅局面。因此要用數據去營運一間公司嘅話，首先當然要確保數據嘅準確性。無人可以話你所收集嘅數據係百分百準確，因為事實上係好難，只不過如果選擇利用數據就應該尊重個結果！
「數據」
點為之尊重自己嘅行業？好簡單，就係尊重數據！經過無數次被擊倒嘅感覺真係唔係幾好受，但係數據唔會欺騙你，係咁嘅就係咁，無得呃！好多時都會遇到一啲公司表面話要用數據去了營運業務，但係當做完分析之後就質疑啲數據，就算用唔同嘅方法去證明同一件事，到頭來佢哋都係繼續一如以往，自己行自己嗰套，就係繼續相信過往嘅經驗。
「經驗」
當然我唔會否定過往嘅經驗，因為我好多時都會講，分析嘅結果係好在乎分析嘅角度！就算角度一樣，但係時間，環境同行業都唔同嘅話，其實出嚟個結果都會好唔同。不過願賭要服輸，就算個結果好定壞，其實都要去接受！邊度有可能輸打贏要？就係因為要知道問題嘅根源，所以先至要用數據。數據雖然唔係萬能，但係今時今日嘅公司無數據就萬萬不能！
本文內容由作者 Kenneth Kwok 授權轉載，原文標題為：要認輸，文章標題由 TechApple 編輯部修訂。以上言論屬於作者個人意見，並不代表 Techapple.com 立場。
 |
作者簡介：郭嘉俊 ，畢業於澳洲麥覺理大學工商管理碩士，近年專注數據分析行業推廣同發展。曾從事平面設計，網站開發，企業管理及商業諮詢等工作，於 2010 年創辦 Beehive Strategy （蜂策略），為亞太地區不同企業提供數據分析服務。
公司網址：Beehive Strategy |
